Pétur Tyrfingsson sálfræðingur hefur orðið!

Leyfi mér að birta hér hluta af athugasemd sem bloggvinur minn Pétur Tyrfingsson sálfræðingur skrifaði eftir síðasta pistilinn frá mér um sálfræðinga og hugræna atferlismeðferð. Það eru fáir sem eru jafn snjallir í retorík og Pétur. Ég man eftir því þegar ég heyrði hann í fyrsta sinn halda ræðu. Það var mikil upplifun. Nú sannar hann það með þvílíkum ágætum á sínu frábæra bloggi að hann er fantagóður penni. En hér kemur ábending Péturs:- Ábending til þeirra sem velta fyrir sér hvar hægt er að fá hugræna atferlismeðferð: Það er ekkert annað en t.d. að leita til geðsviðsins og biðja einfaldlega um hana eða hringja í gulu síðurnar og spyrja hvort viðkomandi sálfræðingur bjóði eða kunni eitthvað í þessari meðferð og þá í sambandi við það vandamál sem um ræðir. Fólk á bara að vera ófeimið við að biðja um það sem það vill, ekki bara panta tíma hjá næsta sálfræðingi og láta eins og allir séu þúsundþjalasmiðir (þeir eru nefnilega ekki til). Sálfræðingur sem gefur tíma og spyr ekki hver vandinn sé áður en borgað er fyrir viðtal hefur annað hvort gleymt því eða brotið reglu sem ég set mér (veit ekki hvort aðrir ættu að gera það) og hún er sú að taka ekki við fólki nema ég telji nokkrar líkur á að ég treysti mér til að aðstoða viðkomandi í þeim tiltekna vanda sem um ræðir. Þetta er strax traustvekjandi ef sálinn byrjar á því að ganga úr skugga um þetta. Varist þúsundþjalasmiðina. Meðferð er ekki spjall eða stefnulaust hjal við sálfræðing. -