KLUKKAÐUR

Jááá, nú eru nokkur búin að “klukka” mig og þá skilst mér að maður eigi að reikna upp nokkur atriði um sjálfan sig sem ekki koma fram í blogginu eða í höfundalýsingu s.b.r lesblindur dósent í sálfræði með rætur í.... etc..Hér koma þá átta atriði:

1) Ég var í MH, tók síðan BA í sálfræði við HÍ og Hagnýta fjölmiðlun við sama skóla áður en ég fór í framhaldsnám til Svíþjóðar.

2) Ég vann hjá Krabbameinsfélaginu í 7 ár þar sem ég m.a. þróaði og stýrði námskeiðum í Reykbindindi og skipulagði ráðstefnur um aðhlynningu deyjandi krabbameinssjúklinga og aðstandenda þeirra.

3) Ég var mikill áhugamaður um leiklist á árum áður og lék asna í Kardimommubænum í Þjóðleikhúsinu þegar ég var 16 ára (ég lék framhlutann og Árni Guðmundsson vinur minn lék hinn hlutann). Lék líka m.a. Betlarakónginn tengdapabba Makka Hnífs (sem nafni minn Bragason lék) í Túskildingsóperunni í MH, leikstjóri var Stefán Baldursson, síðar Þjóðleikhússtjóra. Jóhanna Þórhallsdóttir söngkona lék eiginkonu mína í þeirri sýningu.Steingerður Steinarsdóttir blaðamaður og bloggvinkona mín, lék hóru.

4) Ég var varaformaður Stúdentaráðs í HÍ og hafði frumkvæði að stofnun (endurvakningu) Stúdentaleikhússins 1982 sem setti upp leikritið Bent sem sína fyrstu sýningu.

5) Ég var rosalega feiminn sem krakki og unglingur. Fékk bullandi hjartslátt ef ég þurfti að tala fyrir framan fólk. Læknaði sjálfan mig af þessu í MH með því að þvinga mig til að tala sem mest á opinberum vettvangi, taka þátt í leiklist, vera virkur í félagslífinu og vera almennt óþolandi áberandi. Vona að skólafélagarnir fyrirgefi þetta, en ég hafði bara ekkert val.

6)Ég starfaði sem gæslumaður á Kleppsspítalanum um 10 ára skeið með skóla. Var ein aðal sprautan í ólöglegu verkfalli starfsfólks á Kleppi og Kópavogshæli (1981 að mig minnir). Verkfallið varaði í ca. viku og var verkfallsvaktin heima hjá mér á Njálsgötu 60 í íbúð sem við Friðrik Indriðason (Frikki) blaðamaður (bróðir Arnaldar) leigðum saman.

7) Stofnaði á menntaskólaárunum ungmennafélagið Þjóðbjörg ásamt Ólafi Ólafssyni formanni Yfirskattanefndar. Þjóðbjörg gaf út tímaritið Þremill og hirðljósmyndari Þremils var Páll Stefánsson eðalljósmyndari.

8)Ég var í Klúbb 71 hjá Æskulýðsráði Reykjavíkur á unglingsárunum ásamt m.a. æskuvini mínum Árna Guðmundssyni bloggara og æskulýðsfrömuði. Þar frömdum við miklar leiklistakúnstir undir stjórn Ketils Larsen og lékum m.a. jólasveina í nokkur ár á Austurvelli þegar kveikt var á jólatrénu.

Athugasemdir

[Brattur, 13.7.2007 kl. 17:29]

...ja hérna Ásgeir, þú ert hæfileikaríkur maður með glæstan feril... leiklistaferillinn kemur  mér skemmtilega á óvart... ég hef lúmskan grum um að þú hafir gaman af sænskum vísnasöng!???

[Brattur, 13.7.2007 kl. 17:37]

p.s. ég fékk bréf frá "þér" í gær... varstu búinn að skoða það...?

[Ásgeir Rúnar Helgason, 13.7.2007 kl. 18:32]

Ha Gísli?

Nú er ég ekki alveg með á nótunum - hvaða bréf?

Og jú, ég hef gaman af vísnasöng, sænskum og íslenskum:

[Brattur, 13.7.2007 kl. 18:50]

... ég er að leika mér smávegis að "skálda upp í bloggvini"... kíktu á síðuna mína...

einu sinni sjá ég Fred Åkeström á tónleikum í Norrænahúsinu í Reykjvík... fátt hef ég séð betra í músík og tjáningu síðan...

[Ásgeir Rúnar Helgason, 13.7.2007 kl. 22:03]

Gott mál Gísli,

þú ert Brattur:

[Guðný Anna Arnþórsdóttir, 13.7.2007 kl. 23:00]

 Frábær klukk-atriði!

Ásgeir, við bara hljótu að hafa hizt í lifanda lífi, meina sko annarstaðar en á blogginu. Ég sá þessa uppfærslu á Kardimommubænum, - hún var æðisleg. Ég vann á Kleppi þegar þessi ósköp í verkfallslíki dundu yfir. Ég man óljóst eftir Njálsgötu 60, en kom aldrei þangað. Ég hef sótt allar ráðstefnur á Íslandi um aðhlynningu deyjandi fólks (held ég) og sinnti slíku beint og óbeint á Borgarspítalaárum mínum (1988 til 2000). Ja, víða liggja leiðir!!

[Guðný Anna Arnþórsdóttir, 13.7.2007 kl. 23:01]

PS:  Sú obsessíva-kompúlsíva segir: þetta átti að vera hjótum

PS2: Ketill Larsen var heimagangur á heimili bestu vinkonu minnar og því einkavinur okkar vinkvendanna.

[Ásdís Sigurðardóttir, 13.7.2007 kl. 23:17]

Flott að klukka þig, þú hefur gert ýmislegt.  Hitasvækjukveðja frá Selfossi alveg 20 í dag og 16 í kvöld.

[Ásgeir Rúnar Helgason, 14.7.2007 kl. 07:26]

Já Guðný, við hljótum að hafa krækt saman hornunum einhverntíma. ´

Ásdís, vona að þú bráðnir ekki:

[Jón Steinar Ragnarsson, 16.7.2007 kl. 06:26]

Ég er svoddan óttalegur félagsskítur að ég nenni ekki svona uppátækjum. Á ekki plötur með Bubba og keypti aldrei fótanuddtæki. Mótmælti ekki í Straumsvík eða á Kárahnúkum og mætti ekki á minningarathöfnina um púðluhundinn myrta að meint var.  Er heldur ekki í Íslandshreyfingunni eð a Save Iceland.  Var skítsama um Keikó, borða hvalkjöt og fitu.  Forðast allt sem inniber orðin "létt" eða "sykurskert" í sér, reyki og klukka ekki og tek ekki við klukkum.

[Ásgeir Rúnar Helgason, 16.7.2007 kl. 13:55]

Þetta var hellingur af upplýsingum um þig Jón Steinar = örugglega meira en 8 atriði:

Kannski ekki Klukka en örugglega arbandsúr: